تم التقاط صورة لزكريا بوقرة في سهرة دون كما و تواجده مع عدة أشخاص على عكس مادعى إليه المدة الآخيرة أثر انتشار فيروس اوميكرون في تونس باحترام البروتوكول الصحي و الحجر الصحي الشامل و عدم الخروج من المنزل ، و هذا كان رد زكريا بوقرة في صفحته فيسبوك باكيا و هذا ماجاء في نص تدوينة :
ريتوها التصويرة هذه؟
التصويرة هذه موش انا الي خذيتها
التصويرة هذه اقتطفوها جماعة عبد اللطيف المكي وشنو بيها حملة "لن ننساك يا ولد الهجالة"
الحملة بداوها ب300 partage نهار 15 افريل 2020 على الساعة 20
وقتها حبو يشوهوني ويخرجوني بصورة المتشائم على اساس انا قلت بش يموتو عشرات الآلاف وقصو من الجملة كان ما نعملوش حجر صحي شامل
وقتها وجعتني بارشا الحملة متاعهم اما ما رخيتش
بالعكس عملت الصفحة وحطيتها هي photo de profil
خاطر عارف شنوة بش يصير في الشعب كان الدولة تواصل في سياسة الموت
بعد وقت المشيشي كيف كيف الهجوم ما وقفش اما على الاقل حملاتهم ولات أرقى شوية بالmeme والتفدليك
(للأمانة فما حاجات انا بيدي قتلوني بالضحك وقتها)
اما هدفهم كان التقزيم واخراجي في ثوب المهبول الي موش لازم تسمعو كلامو
بارشا عباد مشات معاهم وامنو الصورة النمطية هذيكا لين صارت موجة الدلتا والعباد الكل رجعت لكلامي وفهمو اني ما كذبتش عليهم
ما نلومهمش
هذه مكينات كبيرة والتشويه عندهم علم
بالرغم من هذا ما رخيتش
خاطر عارف شنوة بش يصير في الشعب كان الدولة تواصل في سياسة الموت
كلامي يقلق بارشا
نعرف
انا بيدي نقلق بارشا
ماني تابع حتى حزب تي اصلا عمري ما صوطت لحتى حد في حياتي
فلوس؟ ما عنديش. عامين توة ناخو في مصروفي من عند العايلة وحتى الإعلام لا مرة خذيت مليم.
الخدمة الي ينجمو يوقفوني منها ما فماش. عامين نخدم متطوع بلا حتى فرنك ومعطل مستقبلي بالعاني بش ما يتحكم حد في الي نقولهولكم
ما لقاو شيء عليا حتى شيء
حاولت قدر الإمكان اني نكون مثالي
مانيش نبي انسان كي العباد الكل اما حاولت أن نتجنب اي مشكلة
عارف الي عندي مسؤولية أكبر مني ومن حياتي
قبلت ظربهم الكل وما وريتش
بالرغم اني توجعت
وتوجعت باااااارشا
موش منهم هوما
هوما ما علا بالي بيهم
توجعت من الناس الي حبيت نمنعهم
الايامات الأخيرة رجع الهجوم
خذاولي تصويرة وانا نتعشى
مشيت وقتها ناخو في بيدزا قبل ما نمشي للتلفزة
عملو منها قضية الشرق الأوسط ردو فما طفلة طردتني وكل واحد يزيد من عندو
بالرغم اني ما خالفت حتى بروتوكول والدليل اني نهارتها في المباشر على تلفزة تي في، الناس الكل نهشتلي اعظامي
البارح نهار كامل نبكي بالشهقة
اي نبكي
انا انسان بكاي وما نحشمش بش نقولها
الله غالب من الي صغير حساس بزايد نسخف على العباد على القطاطس تي حتى الناموس يسخفني وما نحبش نستعمل الفليتوكس
هذا انا وممكن هذا لواش قعدت مكبش في سياسة ما تعجبش صحيح اما تمنع العباد
البارح حسيتها بااااااااارشا
ما عندكمش فكرة قداش وجعوني
ما نحبش نوريكم اما راني نحس
راني نقراهم الكمنتارات الكل متع الغراب متع البومة ومتع السبان
حتى البلوك قليل وين نستعملو خاطر يسخفوني العباد ونلوم روحي كان تصيرلهم حاجة خاطر انا قصيت عليهم المعلومة
حاولت نتحمل على روحي من غير ما نوريكم
حاولت نشد صحيح ونكبش
اما راهي تصعاب ساعات
تصعاب بااااااااارشا
ليوم خير شوية حمدوله
موش بش ينجمو يوقفوني
موش بش ينجمو يرهبوني
وعدتكم اني بش نواصل لآخر لحظه مهما كان الثمن
هذا هو الثمن ليا انا
حكاية فارغة قدام شنوة صار في العباد من الفيروس
الي نعمل فيه موش لروحي
الي نعمل فيه على خاطركم
ما رخيتش قبل وموش بش نرخ توة
خاطر عارف شنوة بش يصير في الشعب كان الدولة تواصل في سياسة الموت
Merci merci merci
للعباد الي ديما واقفة معايا من الي بدأ الوباء لتوة
قوتي جزء كبير ناخو فيها من عندكم
قد ما نشكركم وشوية
في بالنا من الاول انها حرب
والحرب عمرها ما كانت ساهلة
اما متأكد الدوام ينقب الرخام
واكيد تو نربحو وسنخلص تونس من شر الوباء والدولة
#تسقط_دولة_الموت
#حجر_صحي_شامل
تعليقات
إرسال تعليق